الصندوق فيه فيل!

الصندوق فيه فيل!
01 نوفمبر 2015

الصندوق فيه فيل!

محمد زكي

< بمناسبة التعديل الوزارى المرتقب بعد مجلس النواب.. ابتسموا علشان صورة الحكومة والنواب تطلع حلوة!

< مع أننا دهنا الهوووا دوكو وخرمنا التعريفة.. فلا يزال المواطن الغلبان فى نظر الحكومة «بنكلة»!

< حكومة «سى سماعين» ضحت بالمحافظ الأمريكاني «التاتو» علشان حكومته تعييييييش وتاكُل قراقيش!

< فى السجون زنزانة «مفروشة» و«كبائن تليفونات» يبقى شعار السجن الجديد «استقبال وفندقة واصطباحة»!

< لو بطلنا نحلم.. هنشوف الحقيقة «المُرة».. ولو بطلنا نفكر محدش فينا هيفهم حاجة لأننا نعيش في زمن «الغم الكحيل»!

< «السلفيون» خرجوا من مولد انتخابات سيدى البرلمان بلا «فتة»!

< أخيراً.. استقالت الألمعية ريهام سعيد من «صبايا الخير» بعد فضيحة «فتاة المول» على طريقة تجيبها كده تجيلها كده.. هيه كده!

< معدتش تفرق عندنا مصطلح استقالة أو إقالة المحافظ السكندرى «التاتو» لأن حكومة «سى سماعين» كده كده «مُقالة» من الغلابة!

< حلمت اللهم يجعله خير أن مجلس النواب القادم هيغُلق أبوابه فى «كذبة أبريل»!

< استعد يا ناخب.. المرحلة الثانية من ماراثون مجلس النواب هيكون فيها «رشوة سلفية وبيتزا وفطير»!

< مطبلاتية الإعلام الفضائي تحالفوا مع الشيطان أشتاتاً أشتوت ضد الألمعية ريهام سعيد على خطى المثل «البقرة لما تقع تكتر سكاكينها»!

< عزيزى المرشح.. سيبك من مولد الانتخابات.. وخُش على «مولد التحالفات»!

< بعد تجميد قرار العشر درجات فى الثانوية «العامية».. أكيد وزير التعليم هيقول المرة دى: «كلمتى لا ممكن تنزل الحوش أبداً»!

< «العسل السياسى» طلع مغشوش بالجلوكوز.. و«المال السياسى» طِلع مغشوش فى النواب!

< الأمل المعقود فى مجلس النواب القادم أن يكون «سيد ائتلافه»!

< الفساد له «أنياب» والمفسدون لهم «فك مفترس»!

< بعد فض مولد انتخابات «مجلس النواب» أكيد الحكومة هتوزع على الشعب «بونو بونو»!

< الرقص النهاردة على أغنية «مفيش صاحب يتصاحب» والغُنا بُكرة على أغنية «اتنين اتنين وصحبك الدولار والجنيه»!

< فى لبنان حملة «طِلعت ريحتنا» وفى مصر الحكومة «طلعت روحنا» بعدما خنقتنا من ريحة غلاء الأسعار!

< على رأى الإعلامى يوسف الحسينى: «نصف الشعب نايم فى العسل» وطبعاً عسل اسود بستين طحينة!

< كان يا ما كان فى وزير كان مش تمام.. دخل الوزارة الخضرااا وخرج بفضيحة حمرااا زى شقة «البطيخ».. ودلوقتى نايم على البورش سطيح.. وتوتة توتة ولسه ما خلصتش الحدوتة.. فاسدة ولا ملتوتة!

< محدّش فَهّمْنَا أن المرحلة الثانية من انتخابات البرلمان هترفع شعار العنف «قاتل لمقتول»!

< محدّش فَهّمْنَا أن «المال السياسى» حضر بقوة فى الجولة الأولى لانتخابات البرلمان بينما غاب «المرشح السياسى»!

< محدّش فَهّمْنَا أن «حزب الكنبة» عاد من جديد فى الجولة الأولى لانتخابات البرلمان.. وعلى السادة راكبى «الموجة الثورية» النزول فى المرحلة الثانية!

< محدّش فَهّمْنَا ليه الشباب وقفوا يتفرجوا على المشهد الانتخابى من خلف أسوار «حزب الكنبة»!

آَخِر شَوْكَشَة

< على مقولة الفنان الراحل توفيق الدقن: «العلبة دى فيها فيل».. وطبعاً الصندوق الانتخابى فيه «فِل وفيل وفلافيلو» والحدق يفهم!

 

 

‏Elzaky2020@gmail.com

  • تعليقات فيسبوك
  • اعلان